ທາດສາມປາງ ອີກໜຶ່ງອະລິຍະທຳຂອມບູຮານ ໃນດິນແດນລາວໃຕ້

ທາດສາມປາງ, ເມືອງສຸຂຸມາ; ທາດສາມປາງ ເປັນສະຖານບູຮານທີ່ເກົ່າແກ່ ຂອງເມືອງສຸຂຸມາ ກໍ່ຄືແຂວງຈໍາປາສັກ. ຕັ້ງຢູ່ເຂດ 4 ໂນນຍ່າງ, ເມືອງສຸຂຸມາ. ຫ່າງຈາກເມືອງສຸຂຸມາ ໄປທາງຕາເວັນຕົກສຽງເໜືອປະມານ 13 ກິໂລແມັດ, ຫ່າງຈາກເມືອງປາກເຊໄປທາງຕາເວັນຕົກສຽງໃຕ້ປະມານ 72 ກິໂລແມັດ, ສະຖານທີ່ແຫ່ງນີ້ ຕັ້ງຢູ່ທົ່ງຮາບຫ້ວຍຂະໜວນ ເຊິ່ງເປັນສາຂາໜຶ່ງ ຂອງແມ່ນໍ້າຂອງ. ໃນອາດີດ ຫ້ວຍນີ້ມີນໍ້າໄຫຼ່ຕະຫຼອດ, ຄົນບູຮານໄດ້ໃຊ້ເປັນທາງຂົນສົ່ງ ແລະ ໄປ ມາຫາສູ່ກັນ. ພ້ອມນີ້ ຍັງມີເສັ້ນທາງບູຮານ ໄດ້ເນັ່ງຈາກວັດພູໄປທາງໃຕ້ ຈົນເຖິງຊາຍແດນກຳປູເຈຍ. ປັດຈຸບັນນີ້ ຍັງໄດ້ ພົບເຫັນຢູ່ບາງຕອນ ກໍ່ຖືກທຳລາຍ ໂດຍສະເພາະປະຊາຊົນເຮັດໄຮ່, ເຮັດນາ, ປຸກເຮືອນຊານໃສ່ ແຕ່ກໍ່ຍັງສາມາດສັນ ນິຖານໄດ້ວ່າ: ແມ່ນເສັ້ນທາງຄູບູຮານ.​